9 წელი გავიდა იმ საზარელი მოვლენების შემდეგ, რომელიც ჩვენი ქვეყნის ისტორიაში 2008 წლის აგვისტოს რუსეთ–საქართველოს ომის სახელით შევიდა. ომმა 30 ათას ადამიანს ბედად დევნილობა არგუნა და ასეულობით

ადამიანის სიცოცხლე შეიწირა.

2008 წლის შემდეგ ყოველ 8 აგვისტოს – ომის დაწყების დღეს–განსაკუთრებული გულისტკივილით და ემოციებით ვხვდებით.

ომიდან 9 წლის თავზე ახალგორის მუნიციპალიტეტმა აგვისტოს ომის გმირის ლევან მიდელაშვილის მემორიალთან ღონისძიება ჩაატარა. მუნიციპალიტეტის გამგებელმა ნუგზარ თინიკაშვილმა და საკრებულოს თავმჯდომარემ თამაზ ბალაშვილმა გმირის მემორიალი გვირგვინით შეამკეს.

ღონისძიებას ესწრებოდნენ სახელმწიფო რწმუნებული–გუბერნატორი ლევან ზაუტაშვილი,მცხეთის მაჟორიტარი დეპუტატი დიმიტრი ხუნდაძე, ქალაქ მცხეთის მერი ავთანდილ ნემსიწვერაძე, ქალაქ მცხეთის საკრებულოს თავმჯდომარე ილია ჯიშკარიანი, მცხეთის მუნიციპალიტეტის საკრებულოს თავმჯდომარე ჯემალ სოლოღაშვილი, მცხეთის მუნიციპალიტეტის გამგებლის მოადგილე მადონა ჯიქია.

სტუმრებმა სიტყვით მიმართეს დაღუპილის მშობლებს, ახლობლებს და მოსახლეობას, გამოხატეს დიდი გულისტკივილი, მხარში დგომა და პატივი მიაგეს 8 აგვისტოს ომში გმირულად დაღუპულ ლევან მიდელაშვილის ხსოვნას.

ახალგორის მუნიციპალიტეტის ხელმძღვანელობამ ასევე გვირგვინით შეამკეს მუხათგვერდის ძმათა სასაფლაო.