ჩემო ძვირფასო ახალგორელებო, ქსნისხეველებო, გულითადად მინდა მოგილოცოთ დამდეგი 2018 ახალი წელი. მომავალი წელი ყოფილიყოს ჩვენი სამშობლოს გაერთიანების, გაძლიერების, ეკონომიური და სოციალური აღორძინებისა და წინსვლის, ურთიერთთანადგომისა და სიყვარულის წელიწადი. თითოეული ჩვენთაგანის ოჯახის ბედნიერება და სიკეთე სწორედ ჩვენი ქვეყნის სიძლიერეზე და წარმატებაზეა დამოკიდებული, სხვაგვარად ჩვენი სანუკვარი ოცნება ჩვენს მამა-პაპის ფუძეზე დაბრუნება შეუძლებელი იქნება.

საქართველოს მთავრობა ყველაფერს აკეთებს სამშობლოს გაერთიანებისა და გაძლიერებისთვის.

ახალგორის მუნიციპალიტეტი მიუხედავად ჩვენი მწირი შესაძლებლობისა და ვითარებისა, რაშიც ვიმყოფებით, მცდელობას არ ვაკლებთ საკუთარი კომპეტენციის ფარგლებში ვიზრუნოთ წეროვანის, წილკანისა და ფრეზეთის დასახლებებისთვის, როგორც ინფრასტრუქტურული, საყოფაცხოვრებო ასევე სოციალური და სამედიცინო მომსახურეობის ხელმისაწვდომობისა და გაუმჯობესების მიზნით. თუმცა მხოლოდ ხელისუფლება, როგორც ცენტრალური, ისე ადგილობრივი თუნდაც რომელიმე პიროვნება ვერცერთ შემთხვევაში ვერ შეძლებს არსებული უმძიმესი გამოწვევების გამკლავებას და პრობლემების მოგვარებას თუ ყველა არ გავერთიანდით, თუ ყველამ არ მივიღეთ მონაწილეობა ჩვენი სამშობლოს აღმშენებლობის საქმეში. ჩვენ, დევნილებს განსაკუთრებით მძიმე ხვედრი გვარგუნა ბედმა და განსაკუთრებით ეხლა გვმართებს ერთობა, რათა ერთმანეთს შევუმსუბუქოთ ის მძიმე მდგომარეობა, როგორც ფსიქოლოგიური ისე სოციალური. პირადად მე და მთლიანად ჩვენი მუნიციპალიტეტის ხელმძღვანელობა და კოლექტივი მზად ვართ მომავალშიც ღირსეულად ვემსახუროთ საკუთარ ხალხს და ქვეყანას.

კიდევ ერთხელ მოგილოცავთ დამდეგ შობა-ახალ წელს, ასევე გილოცავთ ჩვენი უწმინდესი პატრიარქის ილია მეორის აღსაყდრების 40 და დაბადების 85 წლისთავს. ერთად ვილოცოთ მისი ჯანმრთელობისა და დღეგრძელობისათვის, როგორც მშვიდობის, სიკეთის, სიყვარულის ტოლერანტობის, საქართველოს კეთილდღეობისა და მართლმადიდებლური ეკლესიის სიძლიერისა გარანტისა.



პატივისცემით ახალგორის მუნიციპალიტეტის გამგებელი

ნუგზარ თინიკაშვილი